គោលបំណងកម្មវិធីសិក្សាមធ្យមសិក្សាបឋមភូមិ
ការអប់រំនៅមធ្យមសិក្សាបឋមភូមិ មានគោលបំណងកសាងបុគ្គលិកលក្ខណៈល្អប្រពៃ និងលើកកម្ពស់សមត្ថភាពផ្លូវកាយ ចិត្ត និងប្រាជ្ញាសិស្សកម្ពុជាទាំងស្រីទាំងប្រុស ។ ត្រូវធានាឲ្យសិស្សទទួល និងប្រើប្រាស់ចំណេះដឹង បំនិនមូលដ្ឋាន មានសុខភាពល្អ ចេះដោះស្រាយបញ្ហា ចេះធ្វើពលីកម្ម ចូលចិត្តសិក្សា ស្រលាញ់ពលកម្ម ដើម្បីឲ្យគេក្លាយជាមនុស្សមានប្រយោជន៍សម្រាប់គ្រួសារ និងសហគមន៍ អាចបំពេញការងារសមស្រប អាចទទួលការបណ្ដុះបណ្ដាលមុខរបរកំរិតបឋម ឬ មធ្យម និងអាចបន្តការសិក្សាទៅថ្នាក់ខាងលើតទៅទៀត ។
បន្ថែមទៀត ត្រូវជម្រុញឲ្យរីកចម្រើនសេរីភាពខាងគំនិត បញ្ចេញមតិ និងអធ្យាស្រ័យ ហើយខិតខំបង្កលក្ខណៈឲ្យមានការអភិវឌ្ឍព្រមៗគ្នាខាងកោសល្យ ឥរិយាបថ តម្លៃ ច្នៃប្រឌិត សីលធម៌សង្គម និង សិល្ប៍សោភ័ណ ។ ទន្ទឹមនឹងនេះត្រូវជម្រុញឲ្យមានកិច្ចសហការជិតស្និទ្ធ រវាងគ្រូនិងសិស្ស រវាងសាលារៀន គ្រួសារ និងសហគមន៍ ។
ជាក់ស្ដែងកម្មវិធីសិក្សាមធ្យមសិក្សាបឋមភូមិត្រូវធានាឲ្យសិស្ស ៖
១. ចេះកសាងបុគ្គលិកលក្ខណៈរបស់ខ្លួន ក្នុងការស្វែងរកលក្ខណៈសមស្រប ត្រៀមបម្រើសង្គម ។
២. ស្ទាត់ក្នុងការប្រើប្រាស់ភាសាខ្មែរ មានចំណេះដឹង ការយល់ដឹង និងបំនិនក្នុងមុខវិជ្ជាចំណេះទូទៅដែលមានកម្រិតទាន់សម័យ ។
៣. ចេះពង្រឹងសុខភាព និងអនាម័យរបស់ខ្លួន និងរបស់សហគមន៍ ។
៤. អាចផ្ដល់យោបល់ រកឃើញដំណោះស្រាយបញ្ហាសម្រាប់គ្រួសារ និងសម្រាប់សហគមន៍ខ្លួន ។
៥. មានស្មារតីមនុស្សជាតិ គោរពសិទ្ធិមនុស្ស ជួយជ្រែងអ្នកដទៃដោយសុទ្ធចិត្ត ។
៦. ចេះពង្រីកកោសល្យ គុណសម្បត្តិខ្លួន គោរពខ្លួនឯង មានទំនុកចិត្តលើខ្លួនឯង ចូលចិត្តស្វ័យសិក្សាលើកកម្ពស់សមត្ថភាពរបស់ខ្លួនជាប្រចាំ ហើយមានមោទនភាពជាតិជានិច្ច ។
៧. ស្រលាញ់ការងារពលកម្ម អាចធ្វើការជាមួយអ្នកដទៃបានសម្រេចផលល្អ ហើយយល់ដឹងពីលំនាំគ្រប់គ្រងការងារថែមទៀត ។
៨. យល់ដឹងអំពីការវិវត្តនៃរបបសង្គម ហើយអាចធ្វើឲ្យសម្រេចការងារតាមតួនាទីជាសមាជិកល្អនៃសហគមន៍របស់ខ្លួន ។
៩. ចេះថែរក្សាការពារ និងធ្វើឲ្យបរិស្ថាន សិល្បៈ វប្បធម៌ ក្នុងសហគមន៍រឹតតែល្អប្រសើរឡើង ។
គោលការណ៍កម្មវិធីសិក្សាមធ្យមសិក្សា
គោលដៅអប់រំជាតិបានបញ្ជាក់ថា ការអប់រំនៅប្រទេសកម្ពុជាមានតួនាទីកសាងមនុស្សពេញលេញ រីកចម្រើនលូតលាស់គ្រប់ផ្នែកព្រមៗគ្នាដោយមានតុល្យភាពរវាងប្រាជ្ញា ស្មារតី សញ្ចេតនា និងរូបកាយ ។ ហេតុនេះហើយ កម្មវិធីសិក្សាមធ្យមសិក្សាត្រូវតែធានាការអប់រំពេញលេញ ដែលបង្កលក្ខណៈឲ្យសិស្សទទួលបានចំណេះដឹង បំនិន ឥរិយាបថ តម្លៃ និងប្រសិទ្ធភាពនៃបម្រើបម្រាស់ភាសាតាមគោលបំណងដែលបានគ្រោងទុក ។
ក្នុងគោលគំនិតដូចខាងលើ ការអប់រំមធ្យមសិក្សាផ្អែកលើគោលការណ៍ ដូចតទៅ ៖
១. ភាពបន្តពីបឋមសិក្សា
អប់រំមធ្យមសិក្សាត្រូវតែបន្តពង្រីកបន្ថែមចំណេះដឹង បំនិន ឥរិយាបថ និងតម្លៃ ពីបឋមសិក្សា ដើម្បីអភិវឌ្ឍសក្ដានុ-ពលរបស់សិស្ស ឲ្យដល់សេចក្ដីសង្ឃឹមទុក ។
២. អប់រំមូលដ្ឋានសម្រាប់ទាំងអស់គ្នា
នៅមធ្យមសិក្សា សិស្សចាំទទួលការអប់រំមូលដ្ឋានដូចគ្នាទាំងអស់ ។ ការអភិវឌ្ឍផ្លូវចិត្ត និងផ្លូវកាយ ត្រូវតែប្រកបដោយតុល្យភាព និងមានអន្តរៈទំនាក់ទំនងជិតស្និទ្ធ ។ អប់រំតម្លៃសីលធម៌ មិនមែនបង្រៀនតែក្នុងមុខវិជ្ជាអប់រំសីលធម៌ ពលរដ្ឋវិជ្ជាប៉ុណ្ណោះទេ តែនៅក្នុងគ្រប់មុខវិជ្ជាទាំងអស់តាមលទ្ធភាពដែលអាចធ្វើបាន ។ ចំពោះភាសាខ្មែរ ក៏ត្រូវលើកកម្ពស់ និងពង្រឹងនៅតាមគ្រប់មុខវិជ្ជាដែរ ។
៣. ភាពបន្តនៃការអប់រំពេញមួយជីវិត
កម្មវិធីសិក្សាមធ្យមសិក្សាបឋមភូមិ អប់រំសិស្សឲ្យស្រលាញ់ពុទ្ធិ ពង្រីកចំនូលចិត្តរៀនសូត្រ បំនិនសិក្សានិងមានឥរិយាបថវិជ្ជាមានក្នុងការស្វែងរកចំណេះដឹងពេញមួយជីវិត ។
៤. អភិវឌ្ឍន៍គុណសម្បត្តិ
អប់រំមធ្យមសិក្សា ត្រូវតែជួយសិស្សឲ្យរកឃើញបំនិនប្រសប់ សម្បទា និងបំណងប្រាថ្នាពិតប្រាកដរបស់ខ្លួន ដើម្បី ឈានទៅបំពេញមុខរបរសុច្ចរិត និងជាទីពេញចិត្ត ឬដើម្បីបន្តការសិក្សាទៅថ្នាក់លើទៀត ។
៥. ភាពចាំបាច់នៃការអប់រំ
ការអប់រំចាំបាច់ត្រូវតែឆ្លើយតបនឹងតម្រូវការនៃសង្គមសេដ្ឋកិច្ចរបស់មូលដ្ឋាន និងសហគមន៍របស់សិស្ស ។